BACtaldeko bikoak lortu zuen Euskal Herriko txapela Donapaleun
ALFARO – HEGIABEHERE 40
IBARBURU – BERASATEGI 29
Gara
Alfarok eta Berasategik jantzi zuten amateurren Euskal Herriko txapela Donapaleun jokatu zuten finalean. Garaileek partida ederra egin zuten, eta ongi merezitako garaipena izan zen.
Hasierako orekaren ostean, Alfarok eta Berasategik hartu zuten partidaren agintea. Aurrelaria oso ongi aritu zen, pilota ongi tenkatuz, eta botearekin ere primeran moldatu zen. Partidaren erdirako bederatzi kintzeko aldea lortu zuten, 25-16 eta 28-19 aurretik jarrita.
Oraindik denbora bazegoen, eta zaleek bazuten azkaindarrengan itxaropena, baina haien erreakzioa ez zen etortzen, eta BACeko pilotariak 38-22 aurreratu ziren. Norgehiagokak erabakita zirudien. Pilotan, ordea, ezusteak ere izaten dira tarteka, eta azkaindarrek partida galdutzat ikusi zutenean lasaitu ziren. Orduan hasi ziren jokorik onena agertzen, eta bost kintze egin zituzten jarraian. Alfarok berea egin zuen, eta 39-27 aurreratu ziren.
Finala nora joango zen garbi zegoen, baina azkaindarrek beste bi kintze egin eta markagailua itxuratu ahal izan zuten, nahiz eta txapela Biarritzera joan zen.
Beste finalak
Lehen Mailako finalaren aurretik beste bi jokatu zituzten. Bigarren Mailakoak ikusmin dezentea piztu zuen, bertan baitziren Latxerre eta Ithurralde mauletarrak. Orain dela bi urte dena irabazi zuten, baina iaz ia ez ziren ikusi ere egin. Orain arte partida oso onak egin dituzte, baina atzo ezin izan zuten txapela Zuberoa aldera eraman.
Hiriberonde eta Lamour zituzten aurrez aurre, eta 18 eta 40 galdu zuten. Emaitzak dena erakusten du. Hastapenean nahiko oreka izan bazen ere, Nafarroa Behereko pilotariek berehala hartu zuten aldea, eta oso erraz eraman zuten txapela.
Aurrena, ordea, gazteen finala jokatu zuten, eta horixe izan zen arratsaldeko partidarik ederrena. Petotegik eta Zaldunbeherek 40 eta 39 irabazi zioten Gorostegi-Etxemendiri.Lau pilotariek oso neurketa ona egin zuten.