Jai Alai News
Zesta-puntako «Jai Alai League»-k prest dauka mugikorrerako aplikazioa eta dagoeneko deskargatu daiteke Applen zein Androiden.
Ligako pilotariak, rankinga, puntuazioak, emaitzak, frontoiak, egutegia, albisteak… dena dago klik gutxitan eskuragarri. Momentuz Eusko Label Winter Serieseko puntuazioak daude eguneratuta, ligako gainerako hiru txapelketak (Urrezko Xistera, Donibaneko Nazioartekoak eta Paueko Kopa) udaran jokatuko baitira.
Hala ere, hurrengo asteetan jakingo ditugu txapelketa hauetako data eta partehartzaileen izenak.
Gogoratu Iparraldea eta Hegoaldea lehen aldiz batu direla liga bakar batean, zesta-punta profesionalean eta kirol honentzat pausu garrantzitsua dela lau frontoi nagusi hauen bateratze hau: Gernika, Donibane Lohitzune, Biarritz eta Pau, azken hau Frantziako Biarno eskualdean.
Rankinga:
Puntuazioa txapelketa guztietan da berdina eta txapelketaren formatura egokitzen da.
Adibidez, txapelketak ligaxka fasea badu, pilotariak 90 puntu jasoko ditu irabazitako partidu bakoitzean eta 45 galdutakoan.
Kanporaketa fasean berriz, behin bakarrik jasoko ditu puntuak, jokalaria kanporatua den momentuan. Txapela irabaziz gero 2000 puntu, finala galduz gero 1200, eta aurretik kalera joanez gero 750, 360 eta 180, kanporaketa fasearen arabera.
Informazio guztia hala ere, aplikazioan bertan dago eskuragai