Agirre-Belokik Xala-Elkororen aurka jokatuko dute, gaur, Gernikako Torneoko lehen finalerdian
Berria
Lau t’erdiko txapelketaren atarian, gaur hasiko da Gernikako Torneoa. Enpresen ligak udan antolatzen dituen torneoei amaiera jarriko dien feria, hain zuzen.
Santanape pilotalekuan jokatuko den lehen finalerdian (17:00etan), Imanol Agirrek eta Ruben Belokik, Xala eta Aitor Elkororekin neurtuko dituzte indarrak. Gernikako Torneoak, udako beste torneoek duten sona ez badauka ere, enpresa bakoitzak irabazitako torneo kopuruaren berdinketa hautsiko du. Gaurko lehen finalerdian, sasoi joko bolada gozoan dagoen bikote bat, batera jokatzera ohituta ez dagoen beste baten aurka arituko da. Xalak eta Fernando Goñi ordezkatuko duen, Elkorok Logroñoko Sanmateoetako Torneoko finalean aritu ziren bitartean, Agirrek eta Belokik ia ez dute bikote moduan partidarik jokatu. Gaurkoa partida garrantzitsua da Arteako aurrelariarentzat, Agirrek ez baitzuen maila oso onik erakutsi Sanmateoetako Banakako torneoan, eta hain maite duen Bizkaiko ikusleen aurrean bere hautagaitza indartzen saiatuko da kaiolako txapelketaren aurrekarietan. Agirrek ez zuen iazko lau t’erdikoan jokatu, halere Unanuek txapelketari uko egin izanak eta Asegarcek jasaten ari den lesio izurriteak Agirreri ateak ireki liezazkioke. Zaila da, baina Gernikako Torneoan maila ona emanez gero, Asegarceko lehen ordezkoaren tokia bete lezake.
Bengoetxea VI.a eta Ruiz, Sorian nagusi (22-18)
Bestalde, atzo Soriako San Andres pilotalekuan jokatu zen partidan Oinatz Bengoetxea eta Patxi Ruiz 22-18 nagusitu zitzaizkien Pablo Berasaluze eta Kepa Peñagarikanori.
Pintatu berri zegoen Soriako pilotalekuko hormek, asko mantsotu zuten pilotaren abiadura eta ikuskizuna nabari ilundu zuten. Partida luze batean bi atzelariak izan ziren partidako jokalari onenak, Patxi Ruiz batik bat. Lizarrako txapeldun ohiak, Sanmateotan erakutsi zuten hobekuntza berretsi , eta lehia erabaki zuen azken pilotakadetan. Gaurkoan, berriz. lesioek udan lasai jokatzen utzi ez dioten Oskar Lasa bere herkideen aurrean arituko da. Etxarri Aranatzeko pilotalekuan jokatuko den partidan, Capellan-Zubieta, Chafee-Lasa III.aren aurka arituko dira.