(Ezk-Esk) Akarregi, Kortabitarte, Gallastegi, Bolinaga, Astelena frontoian, 1944.Akarregi aurrelaria atzo hil zen. Jose Luis Akarregi Lekeition jaio zen 1923an. Atzelari bezala hasi zuen bere ibilaldi profesionala, baina laster aurrelari izateko dohai onak zituela eta, aurrelari jarri zuten. 40 hamarkadako aurrelari onentsuenen artean zegoen, Onaindia, Atano VII, Bolinaga etabarrekin lehiatu zelarik. Buruz buru, Gallastegik izan zuen aurkari gogorrenetako bat izan zen. Ondarroako frontoian jokatu zuten buruz buruko partiduan Akarregik irabazi egin zion Eibartarrari.
Akarregiren jokoari dagokionez, esan behar da batez ere botez jokatzen zuela. Gogoragarriak ziren eskubiz mozten zituen pilotak txapa gainean. Akarregi jokatzen ikusteko aukera izan zuten pilotazaleek oraindik ere gogoratzen dute zein klase haundiko pilotaria zen.
