Esteban Gaubeka Juan Rekalderi gailendu zaio Euskadiko Banakako Pala Txapelketako finalean
Berria
Jaun eta jabe, txapelketaren hasieratik bukaera arte. Sailkapen fasean onena izan ostean, iragan asteburuan iazko txapeldun Luiz Ziskar menderatu zuen. Atzo, berriz, falta zuen pausoa eman eta Rekalderekikoak egin zituen finalean. Esteban Gaubekak Euskadiko Banakako Pala Txapelketako txapela jantzi zuen lehenbizikoz. Armintzakoak, halere, majo egin behar izan zuen lan iruindar beteranoa mendean hartzeko. Rekaldek, hasierako tantoetan batik bat, indar eta joko erakustaldia egin zuelako.
Gaubeka lezioa ondo ikasita zuela kantxaratu zen: sakearekin Rekalderen eskuina bilatu eta haren sakeei airez erantzuten saiatu. Sake guztiei berdin ekin zien Armintzakoak. Tantoa lortu zuen bakoitzean, aldiz, hurrengo sakea ahalik eta bizkorren ateratzen saiatu zen, aurkaria itotzeko asmoarekin.Rekalde, ostera, eta piloteoan jai zuela jakinda, tantoak sakearekin hausten saiatu zen. Nekeak hartu zuenean, berriz, aurkariaren tanto arteko tartetxoa luzatzeari ekin zion. Ur tragoxka zela, esparatrapua aldatuta edo zuzenean pilota beste aldera boteaz, arnasa hartzen eta Gaubekaren erritmo bizia eteten saiatu zen.
Rekalderen nekea
Finala buruz buruko ezohiko partida izan zen, tanto sail luzerik gabekoa eta azken txanpara orekaturik iritsi zena. Norgehiagokaren lehen zatian bi palistek beren jokoa erakusteko parada izan zuten. Tanto piloteatu eta bihurriak Gaubekaren alde jausi ziren, eta Rekaldek, berriz, ez zuen errukirik erakutsi pilota gozatu zuenean.
Lehia luzatu zenean, ordea, nafarraren jokoak nabarmen egin zuen behera. 24-22koa arte partidari arazorik gabe eutsi bazion ere, hortik aurrerakoak oso desberdinak izan ziren, eta Gaubekak ihes egitea lortu zuen (30-24). Azken tantoetan tartea murriztu bazen ere (31-28), arnasestuka zen Rekalde, eta horrek ez zion utzi pentsatzen; hiru huts egin zituen errenkadan. Hondar tantoa saketik egin zuen Gaubekak.
GAUBEKA 35
REKALDE 29
Iraupena: 65 minutu.
Saketik : Gaubekak 5, Rekaldek 5.
Egindakoak: Gaubekak 23 eta Rekaldek 21.
Galdutakoak: Gaubekak 8 eta Rekaldek 12.
Markagailua: 4-1, 4-3, 8-4, 8-8, 10-10, 16-10, 16-14, 20-15, 22-19, 24-22, 29-22, 30-26, 31-28, 32-29 eta 35-29. Bestelakoak: Euskadiko Banakako Pala Txapelketako finala. Pilotazale ugari bildu ziren Bilboko Deportivo pilotalekuan. Apustuetako dirua nabarmen irten zen Gaubekaren alde.