Martxoak 31, arratsaldeko 19:30tan
Gasteizko Olabe pilotalekuan
MAITE-MAIALEN vs ERIKA-ARAI
GOIKOETXEA-DEL RIO vs BARANDIKA-LEKERIKA
ETB 1en, gaueko 22:15tan
Gasteizko Olabe pilotalekuak zesta-punta jaialdi bikaina hartuko du bihar. ARABA EUSKARAZ-en aldeko jaialdia izango da eta bi partida jokatuko dira. Horitean lehena, Women Winter Serieseko errebantxa!
Erika Mugartegi eta Arai Lejardi markinarrek Durangon irabazitako txapela defendatuko dute Winterreko finalisten aurka. Maite Ortiz de Mendibil gasteiztarra (udalerri honetan dagoen Andetxa herrikoa) eta Maialen Aldazabal berriatuarra. Ezkurdiko finala estua izan zen. 12-15 eta 14-15 irabazi zuten norgehiagoka Erikak eta Araik. Baina Gasteizko errebantxan edozer gertatu daiteke. Kantxa bera ezberdina da. Ezkurdik baino bi metro terdi gehiago ditu Olabek (54,5m). Pilotaleku bizia da eta eskapada apur bat ere badu. Frontoiaren ezaugarrietara egokitu beharko dira beraz lau pilotariak. Hor abantaila du Ortiz de Mendibilek. Etxekoa da eta ordu asko sartu ditu Mendizorrotzako «Beti Jai» frontoigunean.
* Gizonezkoen partida
Bigarren partidan Julen del Riok hartuko du parte. Gasteizko harrobitik ateratako azken pilotaria da eta Winter Serieseko bere debutean joko ona erakutsi duena. Sorozabalekin bikote eginez, esku-eskura izan zuten gero txapeldun izango zirenak, Beaskoetxea eta Lopez, kanporatzea. Urtez urtez koxka bat gora egiten ari da Del Rio eta ikusgarria da pilota eskuinez zelan astintzen duen ikustea. Iñaki Osa Goikoetxearekin bikote benetan indartsua osatzen du. Partida zaila dute Barandika eta Lekerika gernikarrek, baina era berean, elkarrekin jokatzera ohituago daude, Iñaki eta Julen baino.
* Euskal Telebista
Partida ETB 1en ikusi ahal izango da gaueko 22:15tan hasita, gizonezkoen partidarekin hasita. Olabeko txarteldegia arratsaldeko 18:00tan irekiko da eta 18:45tan zabalduko dira frontoiko ateak. Sarrerak online ere badaude salgai, www.arabaeuskaraz.eus eta www.eramanjaialai.com webgunetean.